ՄԱՍՆԱԳԻՏԱԿԱՆ ՊՐԱԿՏԻԿԱ ԷՍՏՈՆԻԱՅՈՒՄ
«Երևանի զբոսաշրջության, սպասարկման և սննդի արդյունաբերության հայ-հունական պետական քոլեջ» ՊՈԱԿ-ի և Էստոնիայի Վալգա մասնագիտական ուսումնական կենտրոնի միջև ակադեմիական համագործակցության շրջանակներում 2015թ. դեկտեմբերի 2-12-ը հայ-հունական քոլեջի մեկ աշխատակից և հինգ ուսանող մեկնեցին վերոնշյալ ուսումնական հաստատություն՝ մասնագիտական պրակտիկա անցկացնելու նպատակով:
Հայ-հունական քոլեջի սաները ծանոթացան սննդի պատրաստման ժամանակակից տեխնոլոգիաներին և եվրոպական ստանդարտներին համապատասխան սպասարկմանը, ներկայացրեցին հայկական համեղ խոհանոցը: Հավատարիմ մնալով արդեն ավանդույթ դարձած սովորությանը՝ հայ-հունական քոլեջի թիմը հայտարարեց հայկական երեկո, որտեղ մատուցեցին հայկական ավանդական ուտեստներ: Հայ ուսանողուհին ներկայացրեց մի գեղեցիկ ազգային պար:
Մասնագիտական պրակտիկան համատեղվեց նաև Էստոնիայի և հարևան Շվեդիայի մշակութային վայրերի այցելությամբ, որը շատ տպավորեց հայ ուսանողներին:
Image
<<ՍՈՒՐԲ ԾՆՈՒՆԴԸ ԵՎՐՈՊԱՅՈՒՄ>> 2015 ԼՅՈՒՔՍԵՄԲՈՒՐԳ
2015 թվականի դեկտեմբերի 2-ից 8-ը Երևանի զբոսաշրջության, սպասարկման և սննդի արդյունաբերության հայ-հունական պետական քոլեջի և Հյուրանոցային ու տուրիզմի դպրոցների եվրոպական ասոցացիայի (AEHT) միջև համագործակցության շրջանակներում՝ քոլեջի երկու աշխատակից և երեք ուսանող Լյուքսեմբուրգում մասնակցեցին <<Սուրբ Ծնունդը Եվրոպայում>> ամենամյա մշակութային ծրագրին:
Հարկ է նշել, որ այս երիտասարդական միջոցառմանը Հայաստանը մասնակցեց առաջին անգամ 2014 թվականին Սլովակիայում: Հայ-հունական քոլեջն առաջինն ու միակն է, որ մասնակցում է <<Սուրբ Ծնունդը Եվրոպայում>> ծրագրին, որի նպատակն է՝ միջմշակութային հաղորդակցությունը, մի շարք եվրոպական երկրներից սպասարկման և զբոսաշրջության բնագավառն ուսումնասիրող երիտասարդներին համախմբելը, սուրբ ծննդյան ավանդույթների ու սովորույթների ներկայացումը: Հայ-հունական քոլեջի սաներն, այս տարի ևս, հավուր պատշաճի ներկայացրեցին, թե ինչպես է նշվում Սուրբ Ծնունդը Հայաստանում, պատրաստեցին և եվրոպացիներին հյուրասիրեցին հայկական ավանդական ուտեստներ, հանդես եկան ազգային պարերով: <<Սուրբ Ծնունդը Եվրոպայում>> ծրագիրն իր տեսակով եզակի է Հյուրանոցային ու տուրիզմի դպրոցների եվրոպական ասոցացիայի (AEHT) կողմից կազմակերպվող բազմաթիվ միջոցառումների մեջ, քանի որ այն իր մեջ ներառում է երիտասարդների համար գրեթե բոլոր կարևոր տարրերը՝ մշակույթ, կրոն, լեզու, պատմություն, գիտելիքներ և կարողություններ:
Հայ-հունական քոլեջը, այս տարի հաջողությամբ կատարելով իր առաքելությունը Լյուքսեմբուրգում, պատրաստվում է մասնակցել Իտալիայում կայանալիք <<Սուրբ Ծնունդը Եվրոպայում>> 2016 ծրագրին:
Image
Image
Image
ՀԱՅ-ՀՈՒՆԱԿԱՆ ՔՈԼԵՋԻ ՏՆՕՐԵՆԸ ՊԱՐԳԵՎԱՏՐՎԵԼ Է ՊԱՏՎՈԳՐՈՎ ՀՀ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐԻ ԿՈՂՄԻՑ
Դեկտեմբերի 1-ը շատ նշանավոր օր էր Երևանի զբոսաշրջության, սպասարկման և սննդի արդյունաբերության հայ-հունական պետական քոլեջի համար: ՀՀ ԿԳ նախարարության նախնական/արհեստագործական/ և միջին մասնագիտական կրթության վարչության մասնագիտական կրթության և ուսուցման բաժնի պետ Ս. Համբարձումյանը ԿԳ նախարար Արմեն Աշոտյանի անունից պարգևատրեց հայ-հունական քոլեջի տնօրեն Արթուր Վարդանյանին՝ երկարամյա մանկավարժական գործունեության, գիտության և կրթության ոլորտում մի շարք ներդրումների և քոլեջի տնօրենի պարտականությունները բաեխիղճ և անթերի կատարելու կապակցությամբ:
Շուրջ տաս տարի պարոն Վարդանյանը ղեկավարում է հայ-հունական քոլեջը: Ղեկավարման առաջին իսկ օրից պարոն Վարդանյանը հավատարիմ է ուսուցման նորարարական մեթոդներին, մշտապես զարգացման և առաջխաղացման սկզբունքներին: Զգալի աշխատանք է կատարել և շարունակում է կատարել եվրոպական կրթական համակարգին ինտեգրվելուն, որի արդյունքում քոլեջը համագործակցում է մոտ 20 արտասահմանյան ուսումնական հաստատությունների հետ (բուհեր և քոլեջներ): Այդ համագործակցությունը լայն հնարավորություններ է ընձեռում հայ-հունական քոլեջի ուսանողներին՝ արտասահմանում մասնագիտական պրակտիկա անցկացնելու և կրթությունը շարունակելու համար:
Հայ-հունական քոլեջի տնօրենը իր հերթին շնորհակալություն հայտնեց ՀՀ ԿԳ նախարարության նախնական/արհեստագործական/ և միջին մասնագիտական կրթության վարչությանը և նախարար Արմեն Աշոտյանին՝ ավելացնելով, որ այդ պատվոգիրը ավելի պարտավորեցնող է իր և որ նա շարունակելու է ջանք ու եռանդ չխնայել հայ-հունական քոլեջի մասնագիտական զարգացման և կրթության որակի բարելավման համար:
Image
Image
ՀԱՅ-ՀՈՒՆԱԿԱՆ ՔՈԼԵՋԻ ՊԱՏՎԻՐԱԿՈՒԹՅՈՒՆԸ ԷՍՏՈՆԻԱՅԻ ՀԱՆՐԱՊԵՏՈՒԹՅՈՒՆՈՒՄ <<Երևանի զբոսաշրջության, սպասարկման և սննդի արդյունաբերության հայ-հունական պետական քոլեջ>> ՊՈԱԿ-ի և Էստոնիայի Հանրապետության Իդա-վիրումաա և Վալգա մասնագիտական ուսումնական կենտրոնների հետ համագործակցության շրջանակներում ս/թ հոկտեմբերի 11-ից 19-ը հայ-հունական քոլեջի պատվիրակությունը տնօրեն՝ պարոն Ա. Վարդանյանի գլխավորությամբ մեկնեց Էստոնիայի Հանրապետություն՝ Էստոնիայի մասնագիտական կրթության ուսուցման ծրագրի օրինակով Եվրամիության կողմից որակավորված մասնագիտական ծրագրին ծանոթանալու և մասնակցելու նպատակով: Պատվիրակության կազմում էր նաև ՀՀ ԿԳ նախարարության մասնագիտական կրթության և ուսուցման բաժնի պետ՝ պարոն Ս. Համբարձումյանը: Վերոնշյալ ուսումնական հաստատություններում երկու կողմերի տնօրենները քննարկեցին Եվրամիության կողմից որակավորված մասնագիտական ծրագիրը և այն ՀՀ-ի միջին մասնագիտական ուսումնական հաստատություններում ներդնելու հնարավորությունները: Տնօրենները քննարկեցին նաև իրենց համագործակցության հետագա քայլերը: Պատվիրակությունը ծանոթացավ Իդա-վիրումաա և Վալգա մասնագիտական ուսումնական կենտրոնների գործունեության սկզբունքներին, ուսումնական պլաններին, կաբինետ-լաբորատորիաներին: Պատվիրակության համար կազմակերպվեցին դասալսումներ՝ եվրոպական ուսուցման համակարգն ավելի լավ պատկերացնելու նպատակով: Գործուղման ընթացքում կազմակեպվեցին հանդիպումներ Իդա-վիրումաա և Վալգա մասնագիտական ուսումնական կենտրոնների սոցիալական գործընկերների հետ, ովքեր ևս ակտիվորեն մասնակցեցին վերը նշված բոլոր քննարկումներին: Կարևոր ձեռքբերումներից էր՝ պարոն Ա. Վարդանյանի և վերոնշյալ մասնագիտական կենտրոնների տնօրենների հետ համատեղ ստորագրված նոր համաձայնագիրը, որն այսուհետ թույլ կտա տարին երկու անգամ Երևանի զբոսաշրջության, սպասարկման և սննդի արդյունաբերության հայ-հունական պետական քոլեջից գործուղել դասախոսներ և ուսանողներ մասնագիտական պրակտիկա անցկացնելու և փորձի փոխանակման համար:
Image
2015թ. նոյեմբերի 9-ին hայ-հունական պետական քոլեջում տեղի ունեցավ կոնֆերանս՝ <<Հոգեկան հիվանդություններ և ֆոբիաներ>> թեմայով: Կոնֆերանսն անցկացվեց <<Սպասարկման կազմակերպում հյուրանոցներում և զբոսաշրջային համալիրներում>> մասնագիտության 3-րդ կուրսի ուսանողների անմիջական մասնակցությամբ: Նրանց կողմից, կոնֆերանսի շրջանակներում, զեկույցի տեսքով ներկայացվեցին հետևյալ թեմաները՝

- շիզոֆրենիա
- մեգալոմանիա
- անձի երկատվածություն
- կինոֆոբիա
- ալյուրաֆոբիա
- ագորաֆոբիա

Կոնֆերանսի նպատակն էր ընդգծել հոգեկան առողջության նորման և վերջինիս կարևորությունը, ինչպես նաև ցույց տալ ախտաբանական երևույթները՝ համապատասխան հիվանդություների, անձնային խանգարումների և ֆոբիաների տեսքով: Կոնֆերանսի ղեկավարն էր քոլեջի հոգեբանության դասախոս՝ Էմմա Արզիևան:
Image
Image

<<ԱՍԵՆՔ ԱՅՈ ՈՉ-ՖՈՐՄԱԼ ՈՒՍՈՒՑՄԱՆԸ ԴՊՐՈՑՆԵՐՈՒՄ>>

2015 թ. հունիսի 3-ից 6-ը Վրաստանի Քոբուլեթի քաղաքում կայացավ <<Ասենք այո´ ոչ ֆորմալ ուսուցմանը դպրոցներում>> հերթական ծրագիրը Erasmus+-ի շրջնակներում:
Ծրագիրը տևեց յոթ օր, որին մասնակցեցին Վրաստանը, Հայաստանը, Էստոնիան և Լատվիան: Հայաստանը ներկայացրեց Երևանի զբոսաշրջության, սպասարկման և սննդի արդյունաբերության հայ-հունական պետական քոլեջը: Քոլեջի խումբում ներառված էին երկու դասախոս և երկու ուսանող:

Ծրագրի նպատակն էր փոխել դասական, ավանդական ուսուցման համակարգը՝ ուսումնական գործընթացն ավելի գրավիչ դարձնելով: Ծրագրի ընթացքում տեղի ունեցան նաև մշակութային միջոցառումներ, որոնց միջոցով մասնակիցներն ավելի լավ ճանաչեցին միմյանց երկրները:

Հայ-հունական քոլեջի պատվիրակությունը հավուր պատշաճի ներկայացրեց Հայաստանը, հայերին, ինչպես նաև հայկական երեկո կազմակերպեց՝ հայկական երգերով ու պարերով:

Image
Image

ՀԱՅ-ՀՈՒՆԱԿԱՆ ՔՈԼԵՋԻ ԵՎ ՄՈՍԿՎԱՅԻ ԻՆՈՎԱՑԻՈՆ ՏԵԽՆՈԼՈԳԻԱՆԵՐԻ ՄԱՍՆԱԳԻՏԱԿԱՆ ՔՈԼԵՋԻ ՀԱՄԱԳՈՐԾԱԿՑՈՒԹՅՈՒՆԸ

 
Հայ-հունական քոլեջի և Մոսկվայի ինովացիոն տեխնոլոգիաների մասնագիտական քոլեջի միջև նոր համագործակցության պայմանագիր կնքվելուց հետո սույն թվականի մայիսի 31-ից մինչև հունիսի 6-ը Մոսկվայից Հայաստան ժամանեցին «Հանրային սննդամթերքի տեխնոլոգիա» մասնագիտության 6 ուսանող և 2 դասախոս-վարպետներ: Մոսկվայի համանուն քոլեջի ներկայացուցիչները հայ-հունական քոլեջում անցկացրեցին իրենց մասնագիտական պրակտիկան՝ ծանոթանալով հայկական խոհանոցի պատմությանը և մի շարք ավանդական ուտեստների պատրաստմանը: Փորձի փոխանակման ծրագրի շրջանակներում նրանց համար կազմակերպվեցին էքսկուրսիաներ Հայաստանի տեսարժան վայրեր: Հյուրերը եղան նաև առևտրաարդյունաբերական պալատում, որտեղ ջերմ ընդունելության արժանացան և մասնակցեցին երիտասարդության հարցերին նվիրված քննարկմանը:
Image
Հայ-հունական քոլեջի տնօրեն Ա. Վարդանյանը ռուս ուսանողների համար ուներ հատուկ անակնկալ: Նա հանդիպում կազմակերպեց խոհանոցի գիտակ, «Հայ խոհարարական ավանդույթների զարգացման և պահպանման» ՀԿ նախագահ, «Արարատ հոլ» ռեստորանի գլխավոր խոհարար և տնօրեն Սեդրակ Մամուլյանի հետ: Վերջինս ուսանողների համար անձամբ վարպետության դաս կազմակերպեց՝ հայկական շատ հայտնի «Արարատ փլավ»-ի պատրաստման եղանակը և խորհուրդը ներկայացնելով: Վարպետության դասից հետո ծավալվեց բուռն քննարկում: Հայ-ռուսական այս նոր համագործակցության շնորհիվ սպասվում են դեռ շատ նմանատիպ այցելություններ երկու ուսումնական հաստատությունների միջև, որի արդյունքում ուսանողները կհամատեղեն ուսումը այլ ճանաչողական միջոցառումների հետ:

ՀԱՅ-ՀՈՒՆԱԿԱՆ ՔՈԼԵՋԻ ԱՅՑԸ ՀՈՒՆԱՍՏԱՆ

Հայ-հունական քոլեջն, այս տարի ևս, ճամփորդություն կատարեց դեպի Հունաստան՝ Սալոնիկ և Աթենք: Պատվիրակությունը, որը բաղկացած էր քոլեջի աշխատակիցներից, ուսանողներից, ինչպես նաև սոցիալական գործընկերների ներկայացուցիչներից, ուղևորության սկզբում այցելեց Վրաստանի Հանրապետության ք. Քոբուլեթիի <<Ախալի Թալղա>> (Նոր ալիք) տարածաշրջանային քոլեջ: Այնտեղ հնարավորություն ընձեռվեց ծանոթանալ քոլեջի ուսումնական գործընթացի կազմակերպման սկզբունքներին, մասնակցել գործնական դասերին, որի արդյունքում վկայականներ շնորհվեցին պատվիրակության անդամներին: Այնուհետև, պատվիրակությունը մեկնեց Սալոնիկ՝ այցելելով հին քաղաքի պատմամշակութային կոթողներն ու տեսարժան վայրերը: Աթենքում արդեն Հունաստանի Հանրապետության ԱԺ նախագահ Զոի Կոստանդուպուլուի հրավերքով, քոլեջի պատվիրակությունն այցելեց Հունաստանի խորհրդարան, որտեղ նրանց ջերմ ընդունեցին ԱԺ նախագահն ու պատգամավորները:

Image
Հունաստանի ԱԺ նախագահի այցը հայ-հունական քոլեջ Հայոց Ցեղասպանության 100-րդ տարելիցի կապակցությամբ

Հունաստանի ԱԺ նախագահ Զոի Կոստանդուպուլուն Հայոց Ցեղասպանության 100-րդ տարելիցի կապակցությամբ այցելեց նաև Երևանի զբոսաշրջության, սպասարկման և սննդի արդյունաբերության հայ-հունական պետական քոլեջ, որտեղ արժանացավ քոլեջի բոլոր աշխատակիցների և ուսանողների ջերմ ընդունելությանը: Հանդիպման ժամանակ ԱԺ նախագահը հայտնեց, որ իր համար մեծ պատիվ է լինել հայերի կողքին նման պատմական պահին, և առավել հաճելի՝ գտնվել մի ուսումնական հաստատությունում, որտեղ վառ արտացոլված է հայ-հունական դարավոր, բարեկամական կապը: Զոի Կոստանդուպուլուն մեկնելիս հուզված ասաց.

Image
<< Որպես հույն՝ ես շատ հպարտ եմ տեսնել հայորդիների, ովքեր հույն չլինելով հանդերձ, հույներից ոչ պակաս ծանոթ են Հունաստանի պատմությանը, մշակույթին և խոսում ու երգում են հունարեն: Խոստանում եմ պաշտոնապես ընդունել այս եռանդուն ուսանողներին հենց Հունաստանի Ազգային Ժողովում, քանի որ գիտեմ, որ շուտով քոլեջից պատվիրակություն է ժամանելու Աթենք >>:
ՀԻՇՈՒՄ ԵՄ և ՊԱՀԱՆՋՈՒՄ ПОМНЮ И ТРЕБУЮ I REMEMBER AND DEMAND

Ապրիլի 22-ին Հայ-հունական պետական քոլեջում տեղի ունեցավ «Աղաղակում է անցյալը, պահանջում՝ ներկան» խորագրով միջոցառում,որի նպատակն էր՝ փաստել սերունդների հաջորդական շղթայի բոլոր օղակների փոխկապակցվածության ներքին խորհուրդը: Քոլեջի սաներն իրենց հարգանքի տուրքը մատուցեցին ապրիլյան անմեղ զոհերի անմահ հիշատակին: 1915 թվականը հավերժ կմնա հայ ժողովրդի հիշողության մեջ:Հայի վերքը երբեք չի սպիանա, քանի որ դա հոգու մեղք է, ոչ թե մարմնի: Այդ վերքի միակ բալասանը կլինի այն, որ Թուրքիայի կառավարությունը և ներկա սերունդը , որոնք փաստացի մեղք չունեն ազգասպան ոճրի մեջ, ոչ թե ջանան թաքցնել իրենց բարբարոս նախորդների արյունոտ թաթը, այլ մաքրեն նրանց կողմից թուրքական պատմության ճակատին խարանած մուրը, պաշտոնապես ընդունեն և հրապարակայնորեն դատապարտեն հայասպանության տեսությունը:Ահա սա էր քոլեջի սաների արդար պահանջը: Անդրադարձ կատարվեց նաև օրերս Հայոց ցեղասպանության 100-րդ տարելիցի կապակցությամբ Հռոմի Պապ Ֆրանցիսկոսի մատուցած պատարագին և ուղերձին:

Image
Սա կարևոր քայլ էր աշխարհին իրազեկելու մարդու իրավունքների մասին, առաջնորդվելու, հիրավի, համամարդկային վեհ արժեքներով և կանխելու հետագա ցեղասպանությունները: Քրիստոնյա աշխարհի վարած քաղաքականությունն աննախադեպ էր.աշխարհը միացավ հայի ցավին, ազնվացավ, բարոյական և քաղաքական ինքանգիտակացության նոր արժեհամակարգի եկավ: Սա մշակութային գիտակցության և մարդասիրական իրավունքի մեջ նոր իրողություն է: 100 տարի է անցել դժնդակ այն օրերից:Տարիների ընթացքն ու բեռը չեն կարող ստիպել, որ մենք մոռանանք այն, ինչ եղել է:Հիշողությունը, սակայն, մարդուն տված չէ անցյալ ցավերն անվերջ նորոգելու, այլ սրբազան հիշատակները պաշտելով հանդերձ՝ նոր ճանապարհն անշեղ անցնելու համար,քանզի դարերի խորքից եկած մեր ժողովրդի հավերժական երթը ոչ ոք և ոչինչ չեն կարող կասեցնել, քանի որ հզոր ու ամրակուռ է մեր հոգին: Տասնամյակներ են անցել եղերական այն օրերից: Վերածննդի ու վերընձյուղման, ծաղկումի ու բարգավաճման տասնամյակներ:Եվ կոտորածից, մահերից ու ավերածություններից փրկված մի բուռ Հայաստանը դարձել է ոչ միայն տեղաբնիկների նորոգ երկիրը, այլև անցած տասնամյակներում հայրենադարձված զանգվածների երջանիկ օթևանը, աշխարհի տարբեր երկրներում հանգրվանած ամբողջ հայության հոգու հայրենիքն ու ազգապահպանման կենսահյութերի հորդաբուխ աղբյուրը: Նրա զավակներն այսօր աշխարհի հետ խոսում են վաստակած հպարտությամբ՝ որպես հզոր տերերն իրենց երկրի, իրենց բախտի ու ճակատագրի:Այստեղ հիշենք սփյուռքահայության առաջին սերնդի գրող Վազգեն Շուշանյանի գրական խոսքը՝ ուղղված իր սենդակիցներին. «Կարևորը միայն ապրելը չէ, այլ մեծությա՛մբ ապրելը», արժանապատվությամբ, ոչ թե գլխիկոր՝ աշխարհի պինդ ճակատին հառած պայծառ հայացքով և ապագայի նկատմամբ անխախտ հավատով:
Image
Ապրիլի 2-ը Երևանի զբոսաշրջության, սպասարկման և սննդի արդյունաբերության հայ-հունական պետական քոլեջի համար առանձնահատուկ օր էր: Քոլեջն այդ օրն իր ջերմ պատերի ներքո հյուրընկալեց Հունաստանի արտակարգ և լիազոր դեսպան պարոն Իոաննիս Տայիսին, ՀՀ ԿԳ Նախարարության աշխատակիցներին և քոլեջի սոցիալական գործընկերներին Սուրբ Զատիկի տոնը, ինչպես նաև Մայրության և գեղեցկության տոնը միասին նշելու համար:
Հյուրերը ներկա գտնվեցին քոլեջի համտեսի սրահում ուսանողների կողմից կազմակերպված բաց դասին, որը մեկնարկվեց «Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանի պատմական ակնարկով, այնուհետև հայ-հունական քոլեջի սաները բավականին մանրամասն հյուրերին ներկայացրեցին Զատիկի ուտեստները և թե ինչ են դրանք խորհրդանշում, արեցին Սուրբ Աստվածաշնչից մեջբերումներ, որից հետո հյուրերը համտեսեցին Զատկի ավանդական ուտեստները:
Օրվա երկրորդ կեսին քոլեջի բոլոր աշխատակիցները, ուսանողները և հյուրերը տեղափոխվեցին քոլեջի դահլիճ Մայրության և գեղեցկության տոնին նվիրված համերգն ունկնդրելու նպատակով: Ելույթ ունեցան մի շարք պարի խմբեր, երգիչներ և դերասաններ՝ Ջուլիետա Բաբայանը, Մարգարիտա Խաչատրյանը, Արայիկ Համբարձումյանը և այլոք: Քոլեջում տիրում էր տոնական բարձր տրամադրություն:

Հայ-հունական քոլեջի սաներն այս տարի որոշեցին Քրիստոսի Սուրբ Ծննդյան օրվանից 40 օր հետո քառասուն օրական մանուկ Հիսուսին տաճարին ընծայաբերելու տոնը՝ Տյառնընդառաջը, նշել հայկական ավանդույթներին համապատասխան ձևով: Քոլեջի համտեսի սրահում կայացավ տոնին նվիրված միջոցառում, որտեղ ուսանողները ներկայացրին տոնի էությունը, ինչպես նաև իրենց իսկ ձեռքերով պատրաստած ուտեստները, որոնք սովորաբար մատուցվում են Տյառնընդառաջի տոնին: Միջոցառումից հետո քոլեջի բակում տեղի ունեցավ Տյառնընդառաջի ծեսը, որին մասնակցեցին ողջ քոլեջի և´ աշխատակիցները և´ ուսանողները:
Image